آئی سی سی نے پاکستان کو بھارت کے خلاف میچ کھیلنے پر آمادہ کرنے کی کوششیں تیز کر دیں

لاہور: انٹرنیشنل کرکٹ کونسل (آئی سی سی) نے پاکستان کو بھارت کے خلاف ٹی ٹوئنٹی ورلڈ کپ 2026 میں میچ کھیلنے پر آمادہ کرنے کے لیے اپنی کوششیں تیز کر دی ہیں۔ اس سلسلے میں آئی سی سی کے ڈپٹی چیئرمین عمران خواجہ نے چیئرمین پی سی بی سینیٹر محسن نقوی سے قذافی اسٹیڈیم میں اہم ملاقات کی، جس میں بنگلا دیش کرکٹ بورڈ کے صدر امین الاسلام بھی موجود رہے۔

ذرائع کے مطابق ملاقات میں چار گھنٹے تک مذاکرات جاری رہے، اور بعد از ڈنر مذاکرات کا مقام تبدیل کرنے کا فیصلہ کیا گیا۔ مذاکرات کو نتیجہ خیز بنانے کے لیے تینوں فریقین نے بھرپور کوشش کی، اور بنگلا دیش سے زیادتی کا ازالہ ہونے کی صورت میں مذاکرات کامیاب ہو سکتے ہیں۔

پی سی بی ہیڈ کوارٹر میں کئی گھنٹوں تک جاری مذاکرات کے دوران یہ بات واضح کی گئی کہ پاکستان کا بھارت کے خلاف میچ کھیلنا یا نہ کھیلنا بعد میں فیصلہ ہوگا۔ آئی سی سی کی درخواست پر چیئرمین پی سی بی نے وزیراعظم شہباز شریف سے رابطے کا فیصلہ کیا ہے اور آئندہ ایک سے دو روز میں ملاقات متوقع ہے۔