قومی ہاکی ٹیم میں اہم تقرریاں، اولمپئن سمیع اللہ چیف سلیکٹر مقرر

لاہور: پاکستان ہاکی فیڈریشن نے قومی کھیل کی بحالی کے لیے بڑا قدم اٹھاتے ہوئے اولمپین سمیع اللہ کو قومی ٹیم کا چیف سلیکٹر مقرر کر دیا ہے۔

فیڈریشن کے اعلامیے کے مطابق سمیع اللہ خان، جو ’’فلائنگ ہارس‘‘ کے لقب سے شہرت رکھتے ہیں، کی تقرری سابق کپتان حسن سردار اور اولمپین اصلاح الدین پر مشتمل کمیٹی کی سفارش پر عمل میں لائی گئی۔

فیڈریشن نے قومی ہاکی کی بہتری کے لیے ایک جامع روڈ میپ بھی جاری کیا ہے، جس کے تحت ٹیم کی تشکیل مکمل طور پر میرٹ کی بنیاد پر کی جائے گی جبکہ نئے ڈھانچے اور معاون عملے کے قیام کا فیصلہ بھی کیا گیا ہے۔

اعلامیے میں کہا گیا ہے کہ مقامی اور بین الاقوامی مقابلوں کے لیے باقاعدہ شیڈول ترتیب دیا جا رہا ہے تاکہ کھلاڑیوں کو زیادہ سے زیادہ مسابقتی مواقع فراہم کیے جا سکیں۔ اس کے علاوہ امپائرز اور آفیشلز کی تربیت کے لیے جدید تکنیکی تعلیم کا اہتمام بھی کیا جائے گا۔

فیڈریشن نے تعلیمی اداروں میں ہاکی کے فروغ اور نئے ٹیلنٹ کی تلاش کے لیے خصوصی اقدامات کا اعلان کرتے ہوئے انٹر اسکول اور انٹر کالجیٹ مقابلوں کے انعقاد اور ہائی پرفارمنس سینٹر کے قیام کا بھی فیصلہ کیا ہے۔

صدر پاکستان ہاکی فیڈریشن محی الدین وانی نے اپنے بیان میں کہا کہ پاکستان ہاکی کو دوبارہ عروج پر لے جانے کے لیے پرعزم ہیں۔ ان کا کہنا تھا کہ انہیں یقین ہے سمیع اللہ خان کی قیادت میں ایک مضبوط اور متوازن ٹیم تشکیل دی جائے گی۔

فیڈریشن نے تمام اسٹیک ہولڈرز اور ہاکی برادری سے اپیل کی ہے کہ وہ اس روڈ میپ کی کامیابی کے لیے بھرپور تعاون کریں تاکہ قومی کھیل کو دوبارہ عالمی سطح پر نمایاں مقام دلایا جا سکے۔