حکومت نے پٹرولیم مصنوعات کی قیمتوں میں کمی کردی

وفاقی حکومت نے آئندہ پندرہ روز کے لیے پٹرولیم مصنوعات کی نئی قیمتوں کا باضابطہ اعلان کر دیا ہے، جس کے تحت پٹرول اور ہائی اسپیڈ ڈیزل کی قیمتوں میں معمولی کمی کی گئی ہے۔

پٹرولیم ڈویژن کی جانب سے جاری کردہ نوٹیفکیشن کے مطابق پٹرول کی قیمت میں 2 روپے 71 پیسے فی لیٹر جبکہ ہائی اسپیڈ ڈیزل کی قیمت میں 3 پیسے فی لیٹر کمی کی گئی ہے۔ اس ردوبدل کے بعد پٹرول کی نئی قیمت 392 روپے 66 پیسے فی لیٹر جبکہ ہائی اسپیڈ ڈیزل کی قیمت 396 روپے 82 پیسے فی لیٹر مقرر ہو گئی ہے۔

آئل اینڈ گیس ریگولیٹری اتھارٹی (اوگرا) نے حکومتی پٹرولیم پرائسنگ میکنزم کے تحت 14 اکتوبر 2026ء کے لیے ایکس ڈپو قیمتوں میں یہ ردوبدل کیا ہے۔ پٹرولیم ڈویژن کا کہنا ہے کہ اعلان کردہ قیمتیں عالمی مارکیٹ میں خام تیل اور ریفائنڈ مصنوعات کے نرخوں، پلاٹس ریٹس (Platts Rates)، پریمیم اور دیگر درآمدی اخراجات میں ہونے والی تبدیلیوں کو مدنظر رکھ کر متعین کی گئی ہیں۔