خلیجی کشیدگی کے باوجود پاکستان میں ایک ماہ کا ایندھن موجود، متبادل سپلائی منصوبوں پر غور

خلیج میں جاری کشیدگی اور ممکنہ جنگ کے تناظر میں پاکستان میں پٹرولیم مصنوعات کی قلت کے خدشات کے معاملے پر سرکاری حکام کا کہنا ہے کہ ملک میں اس وقت تقریباً ایک ماہ کی ضرورت کے مطابق تیار ایندھن موجود ہے۔

ذرائع کے مطابق پاکستان کے پاس تقریباً ایک ماہ کا تیار پٹرولیم ایندھن جبکہ دس دن سے زائد کا خام تیل ذخیرہ موجود ہے۔ مزید حکام کا کہنا ہے کہ مستقبل کی ضروریات کو مدنظر رکھتے ہوئے متبادل سپلائی کے مختلف منصوبوں پر کام جاری ہے۔ پاکستان سعودی عرب سے ریڈ سی کے راستے ایندھن کی درآمد کے امکانات پر بھی غور کر رہا ہے تاکہ ممکنہ سپلائی رکاوٹوں سے بچا جا سکے۔ اس کے علاوہ ملک میں ایندھن کی دستیابی کو یقینی بنانے کے لیے تمام ممکنہ آپشنز زیر غور ہیں۔عالمی مارکیٹ میں موجودہ صورتحال کے باعث پٹرولیم مصنوعات کی قیمتوں میں اضافے کا امکان ہے۔ اگر جنگ طویل ہوئی تو پاکستان امریکہ اور دیگر ممالک سے بھی ایندھن درآمد کر سکتا ہے۔

ذرائع کے مطابق طویل فاصلے سے ایندھن درآمد کرنے کی صورت میں پٹرولیم مصنوعات کی قیمتوں میں مزید اضافہ ہو سکتا ہے۔ ممکنہ صورتحال کے پیش نظر حکومت نے کنڈیسنٹ کی برآمد پر بھی پابندی عائد کر دی ہے۔