خطے میں صورتحال کشیدہ، پاکستان کی خارجہ پالیسی سے متعلق بحث سے اجتناب کیا جائے: اعظم نذیر تارڑ

وفاقی وزیر قانون اعظم نذیر تارڑ نے کہا ہے کہ خطے میں موجودہ کشیدہ صورتحال کے پیش نظر پاکستان کی خارجہ پالیسی سے متعلق بحث سے اجتناب کیا جائے۔ انہوں نے یہ بات پریس کانفرنس میں وزیر اطلاعات و نشریات عطاء اللہ تارڑ اور وزیر مملکت برائے داخلہ طلال چودھری کے ہمراہ کہی۔

اعظم نذیر تارڑ نے کہا کہ پاکستان کا اپنے دفاع اور خارجہ پالیسی کے حوالے سے واضح موقف ہے اور موجودہ صورتحال پر پوری دنیا گہری تشویش میں مبتلا ہے۔ انہوں نے بتایا کہ پاکستان نے معاملے کا سفارتی حل نکالنے کی کوشش کی اور سلامتی کونسل میں اپنا موقف بھرپور انداز میں پیش کیا۔

انہوں نے مزید کہا کہ وزیراعظم پاکستان خطے کے ممالک کے ساتھ رابطے میں ہیں، اور کشیدہ صورتحال کے باعث وزیراعظم کا دورہ روس ملتوی کر دیا گیا ہے۔ اعظم نذیر تارڑ نے واضح کیا کہ اگر ریڈ لائن کراس ہوئی تو قانون حرکت میں آئے گا۔

وزیر اطلاعات و نشریات عطاء اللہ تارڑ نے کہا کہ خارجہ پالیسی کو مقامی سیاست کی نذر نہ کیا جائے، اور بعض مسلم ممالک غلط فہمی میں ہیں کہ مقامی سیاسی معاملات ریاست کی پالیسی کا حصہ ہیں۔