افواجِ پاکستان نے بھارت کو ناقابلِ فراموش سبق سکھایا، وزیراعظم شہباز شریف

وزیراعظم شہباز شریف نے کہا ہے کہ افواجِ پاکستان نے بھارت کو ایسا سبق سکھایا ہے جو وہ کبھی نہیں بھولے گا۔ مظفرآباد میں طلبہ میں لیپ ٹاپ تقسیم کرنے کی تقریب سے خطاب کرتے ہوئے انہوں نے کہا کہ مئی کی جنگ میں آزاد کشمیر کے عوام افواجِ پاکستان کی کامیابی کے لیے دعاگو تھے، جبکہ مقبوضہ کشمیر میں ہمارے بھائی بہن قربانیاں دے رہے ہیں۔ انہوں نے کہا کہ وہ وقت جلد آئے گا جب کشمیر بنے گا پاکستان اور مقبوضہ کشمیر آزاد ہوگا۔

وزیراعظم نے کہا کہ طلبہ کو دیے جانے والے لیپ ٹاپ محض مشین نہیں بلکہ ایک وژن ہیں، اگر یہ رشوت ہوتی تو آج ہمارے نوجوان ڈاکٹر اور انجینئر نہ بنتے۔ انہوں نے واضح کیا کہ آج تک ایک بھی لیپ ٹاپ سفارش پر نہیں دیا گیا بلکہ ہمیشہ میرٹ کو ترجیح دی گئی۔ انہوں نے نوجوانوں پر زور دیا کہ محنت سے پاکستان کو ایک عظیم ملک بنائیں۔

اس موقع پر امیر مقام نے کہا کہ وزیراعظم کی قیادت میں دفاعی اور سفارتی محاذ پر نمایاں کامیابیاں حاصل ہوئیں اور حکومت کی مسلسل محنت سے پاکستان کا عالمی وقار بلند ہوا۔ وزیراعظم آزاد کشمیر فیصل ممتاز راٹھور نے کہا کہ لیپ ٹاپ نوجوان نسل کے لیے رابطے کا اہم ذریعہ ہیں اور اس مہم سے بھرپور فائدہ اٹھانا چاہیے۔