ایران، امریکا، اسرائیل کشیدگی: پاکستان سے مشرق وسطیٰ کی 184 پروازیں منسوخ

ایران، امریکا اور اسرائیل کے درمیان جاری کشیدگی کے باعث 10 ملکوں کی فضائی حدود مسلسل بند ہونے سے پاکستان سے مشرق وسطیٰ کی 184 پروازیں منسوخ کر دی گئی ہیں جس کے باعث مسافروں کو شدید مشکلات کا سامنا ہے۔

ایران، عراق، اسرائیل، کویت، بحرین، قطر اور شام کی فضائی حدود مکمل طور پر بند ہیں جبکہ متحدہ عرب امارات، لبنان اور اردن کی فضائی حدود بھی گزشتہ روز سے پروازوں کے لیے بند ہیں۔

کراچی سے دبئی، شارجہ، دوحہ، نجف، استنبول، ابوظہبی، مسقط، بحرین اور تہران کی 42 پروازیں منسوخ کی گئی ہیں۔ لاہور سے ابوظہبی، دمام، تہران، دبئی، دوحہ، مسقط، راس الخیمہ، شارجہ اور بحرین کی 40 پروازیں منسوخ ہیں۔ اسلام آباد سے دبئی، دوحہ، دمام، مسقط، کویت، ابوظہبی، ریاض، بحرین اور شارجہ کی 36 پروازیں منسوخ کی گئی ہیں۔

پشاور سے دوحہ، دبئی، ابوظہبی، شارجہ اور جدہ کی تمام 18 غیر ملکی پروازیں منسوخ ہیں۔ ملتان سے دوحہ، مسقط، ابوظہبی، شارجہ، دبئی اور جدہ کی 22 پروازیں منسوخ کی گئی ہیں۔ فیصل آباد سے دبئی، شارجہ اور ابوظہبی کی تمام 12 غیر ملکی پروازیں منسوخ ہیں۔

سیالکوٹ سے ابوظہبی، جدہ، دبئی، شارجہ، دمام اور مسقط کی 12 پروازیں منسوخ ہیں جبکہ کوئٹہ سے دبئی کی دونوں غیر ملکی پروازیں بھی منسوخ کر دی گئی ہیں۔ دبئی اور ابوظہبی سمیت امارات کے تمام ہوائی اڈے آج بھی بند ہیں۔

ترجمان پاکستان ایئرپورٹس اتھارٹی کے مطابق پاکستانی فضائی حدود مکمل طور پر کھلی اور محفوظ ہے۔ سعودی عرب کی فضائی حدود بھی کھلی ہیں اور وہاں پروازوں کا آپریشن معمول کے مطابق جاری ہے جبکہ ترکیہ میں فلائٹ آپریشن بحال ہے اور ترکش ایئر کی پروازیں متبادل طویل راستے اختیار کر رہی ہیں۔