امریکی فِن ٹیک وفد کی فیلڈ مارشل سے ملاقات، پاکستان کی ڈیجیٹل معیشت پر عالمی اعتماد میں اضافہ

راولپنڈی میں عالمی فِن ٹیک ادارے ورلڈ لبرٹی فنانشل امریکا کے ایک اعلیٰ سطحی وفد نے چیف آف آرمی اسٹاف فیلڈ مارشل عاصم منیر سے ملاقات کی۔

امریکی وفد کی قیادت ورلڈ لبرٹی فنانشل کے چیف ایگزیکٹو زیکری وِٹکوف کر رہے تھے، جو جنرل ہیڈکوارٹرز پہنچا جہاں دونوں جانب سے باہمی دلچسپی کے امور پر تفصیلی تبادلہ خیال کیا گیا۔

ملاقات کے دوران پاکستان کی ڈیجیٹل معیشت میں عالمی سرمایہ کاروں کی بڑھتی ہوئی دلچسپی پر گفتگو ہوئی اور اس بات پر اتفاق کیا گیا کہ عالمی سطح پر پاکستان کے فِن ٹیک سیکٹر پر اعتماد میں نمایاں اضافہ ہو رہا ہے۔

اجلاس میں مالی شمولیت، ڈیجیٹل ادائیگیوں اور کراس بارڈر ڈیجیٹل فنانس کے فروغ سے متعلق امکانات کا بھی جائزہ لیا گیا۔

اس موقع پر فیلڈ مارشل عاصم منیر نے کہا کہ پاکستان میں سرمایہ کاری کے لیے سازگار ماحول فراہم کیا جا رہا ہے اور حکومت نجی شعبے کے ذمہ دارانہ کردار کو قومی ترقی کے لیے ناگزیر سمجھتی ہے۔

عالمی سرمایہ کاروں نے پاکستان کی معاشی صلاحیتوں کو سراہتے ہوئے ڈیجیٹل اور فِن ٹیک شعبے میں سرمایہ کاری کے مزید مواقع تلاش کرنے میں دلچسپی ظاہر کی۔