وزیر خزانہ سے ورلڈ بینک کے وفد کی ملاقات، معاشی اصلاحات کا جائزہ لیا

وفاقی وزیرِ خزانہ سینیٹر محمد اورنگزیب سے ورلڈ بینک کے اعلیٰ سطحی وفد نے اہم ملاقات کی، جس میں پاکستان اور عالمی بینک کے درمیان جاری معاشی اصلاحاتی شراکت داری، بالخصوص معاشی نمو، روزگار کی فراہمی، مالیاتی نظم و ضبط، اور ریونیو موبلائزیشن سمیت مختلف شعبوں میں اصلاحات کی پیش رفت اور ترجیحات کا تفصیلی جائزہ لیا گیا۔ وزیرِ خزانہ نے زور دیا کہ معاشی اصلاحات کو اب صرف ڈیزائن تک محدود رکھنے کے بجائے ہدفی اور قابلِ عمل اقدامات کی صورت میں نافذ کیا جائے تاکہ کاروباری ماحول اور اقتصادی سرگرمیوں میں نمایاں بہتری لائی جا سکے۔

ملاقات کے دوران ‘گروتھ اینڈ جابز آپریشن’، چھوٹے و درمیانے درجے کے کاروباروں (SMEs) اور ایکسپورٹ فنانس کے فروغ، وزیراعظم کے ‘ایکسس ٹو فنانس’ اقدام، اور ایک متحدہ ‘انسالوینسی فریم ورک’ پر تبادلہ خیال کیا گیا۔ اس کے علاوہ فارماسیوٹیکلز، زراعت، بیجوں کی رجسٹریشن، نیشنل ٹیرف پالیسی اور ٹیکس اصلاحات کے لیے عالمی بینک کی تکنیکی معاونت کا جائزہ بھی لیا گیا۔ فریقین نے جی ایس ٹی ہارمونائزیشن، زرعی آمدنی پر ٹیکس، کیپیٹل مارکیٹس کی وسعت اور حکومت کے رائٹ سائزنگ ایجنڈے کو آگے بڑھانے پر اتفاق کیا، جبکہ محمد اورنگزیب نے ملکی ‘ساورن کریڈٹ ریٹنگ’ میں بہتری کے لیے مالیاتی و قرضوں کے پائیدار انتظام اور ساختاتی اصلاحات کا تسلسل جاری رکھنے کے عزم کا اعادہ کیا۔