پاکستان کو جولائی تا جنوری 5.17 ارب ڈالر بیرونی فنڈز موصول

وزارت اقتصادی امور نے رواں مالی سال کے ابتدائی سات ماہ میں بیرونی ذرائع سے حاصل ہونے والی رقوم کی تفصیلات جاری کر دی ہیں۔

دستاویزات کے مطابق جولائی سے جنوری کے دوران پاکستان کو مختلف مالیاتی اداروں اور دوست ممالک سے مجموعی طور پر 5 ارب 17 کروڑ ڈالر موصول ہوئے۔

رپورٹ کے مطابق اس عرصے میں بجٹ سپورٹ کی مد میں ایک ارب 84 کروڑ ڈالر جبکہ مختلف ترقیاتی منصوبوں کے لیے ایک ارب 90 کروڑ ڈالر حاصل کیے گئے۔

دستاویزات کے مطابق پاکستان کو سب سے زیادہ قرضہ سعودی عرب کی جانب سے فراہم کیا گیا، جس کی مالیت 70 کروڑ ڈالر ہے۔ اسی دوران سعودی عرب کی طرف سے ادھار تیل کی سہولت کی مد میں بھی 70 کروڑ ڈالر کی معاونت فراہم کی گئی۔

چین نے اس مدت کے دوران پاکستان کو 54 کروڑ ڈالر کا قرضہ فراہم کیا جبکہ عالمی مالیاتی فنڈ (آئی ایم ایف) کی جانب سے 20 کروڑ ڈالر موصول ہوئے۔

مزید برآں اسٹینڈرڈ چارٹرڈ بینک نے 14 کروڑ ڈالر، ایشیائی ترقیاتی بینک نے 63 کروڑ ڈالر، عالمی بینک نے 85 کروڑ ڈالر جبکہ اسلامی ترقیاتی بینک نے 53 کروڑ ڈالر کا قرضہ فراہم کیا۔