جنوری میں بجلی کی تاریخی طلب؛ پیک ڈیمانڈ میں 2500 میگاواٹ اضافہ

حکام نے انکشاف کیا ہے کہ گزشتہ ماہ جنوری میں ملک میں بجلی کی طلب تاریخ کی بلند ترین سطح پر رہی، جہاں پیک ڈیمانڈ میں 2 ہزار 500 میگاواٹ کا غیر معمولی اضافہ ریکارڈ کیا گیا۔ نیپرا میں بریفنگ کے دوران بتایا گیا کہ کے تھری نیوکلیئر پلانٹ اور حویلی بہادر شاہ پاور پلانٹ آؤٹ ہونے کے باعث سسٹم پر دباؤ رہا۔ نہروں کی بندش سے ہائیڈرو پیداوار بھی 1000 میگاواٹ کم رہی۔ حکام کے مطابق انڈسٹری کی طلب میں 4 فیصد اضافہ ہوا جبکہ مجموعی طلب توقعات کے برعکس 14 فیصد تک بڑھ گئی۔ سسٹم پر سولرائزیشن کے بڑھتے ہوئے اثرات پر بھی تشویش کا اظہار کیا گیا۔