پاکستان نے یوکرین معاملے کا حل مذاکرات سے ہی ممکن قرار دے دیا

اقوامِ متحدہ میں پاکستان کے مستقل مندوب، سفیر عاصم افتخار احمد نے سلامتی کونسل کے بریفنگ اجلاس میں کہا کہ یوکرین میں جاری تنازع کے پائیدار حل کے لیے مکالمے کی بالادستی ہی واحد قابلِ عمل راستہ ہے۔

انہوں نے زور دیا کہ شہریوں اور شہری تنصیبات کا تحفظ بنیادی ذمہ داری ہے اور بین الاقوامی انسانی قانون کے اصولوں کی مکمل پاسداری تمام فریقوں پر لازم ہے۔ سفیر نے کیف میں قطر کے سفارت خانے کو پہنچنے والے مبینہ نقصان پر افسوس کا اظہار بھی کیا۔

پاکستان نے ماضی میں سفارت کاری اور سنجیدہ رابطوں کے ذریعے حاصل نتائج، جیسے جولائی 2022 میں بحیرۂ اسود اناج اقدام اور سلامتی کونسل کی قراردادیں 2774 اور 2788 کو سراہا۔ سفیر نے عالمی برادری سے اپیل کی کہ فوری جنگ بندی کے ساتھ مذاکرات کے ذریعے تنازع کے پرامن اور پائیدار حل کی کوششیں کریں، جو یوکرین، روس اور یورپ میں امن و استحکام کو یقینی بنائیں۔