ستمبر میں مہنگائی 1.27 فیصد بڑھ گئی، سالانہ شرح 10.26 فیصد ریکارڈ

ادارہ شماریات پاکستان (PBS) نے ماہانہ مہنگائی سے متعلق اپنی تازہ ترین رپورٹ جاری کر دی ہے، جس کے مطابق ستمبر کے دوران مہنگائی کی شرح میں 1.27 فیصد کا اضافہ ہوا ہے، جبکہ رواں مالی سال کی پہلی سہ ماہی (جولائی تا ستمبر) کے دوران مجموعی مہنگائی 10.20 فیصد ریکارڈ کی گئی۔ رپورٹ کے مطابق ستمبر 2025ء کے مقابلے میں ستمبر 2026ء میں سالانہ بنیادوں پر مہنگائی کی شرح 10.26 فیصد رہی۔ ایک ماہ کے دوران شہری علاقوں میں مہنگائی 1.31 فیصد جبکہ دیہی علاقوں میں 1.23 فیصد بڑھی۔

رپورٹ کی تفصیلا ت کے مطابق ستمبر کے دوران اشیائے ضروریہ کی قیمتوں میں نمایاں اتار چڑھاؤ دیکھا گیا۔ ایک ماہ میں بجلی کے نرخ 15.28 فیصد اور موٹر فیول کی قیمتیں 10.76 فیصد تک بڑھ گئیں۔ خوراک کی مد میں پیاز 29.17 فیصد، گندم 3.86 فیصد، آٹا 2.28 فیصد اور دال مسور 1.56 فیصد مہنگے ہوئے۔ تاہم دوسری جانب شہریوں کے لیے ٹماٹر 24.68 فیصد، چکن 8.14 فیصد، انڈے 5.92 فیصد اور آلو 4.19 فیصد سستے بھی ہوئے، جس سے عوام کو بعض غذائی اجناس میں جزوی ریلیف ملا۔