پاکستان کی مدینہ پاور سٹیشن پر حوثی حملے کی مذمت، سعودیہ سے اظہارِ یکجہتی

وزارتِ خارجہ کے ترجمان نے مدینہ منوّرہ میں بجلی کے ترسیلی اسٹیشن پر حوثی ملیشیا کے ڈرون حملے کی شدید ترین الفاظ میں مذمت کرتے ہوئے سعودی عرب کے ساتھ مکمل اظہارِ یکجہتی کیا ہے۔ ترجمان دفتر خارجہ کا کہنا ہے کہ 29 ستمبر کو مسجد نبوی کو بجلی فراہم کرنے والے سول نظام کو نشانہ بنانا ناقابلِ قبول ہے جس سے کروڑوں مسلمانوں کے جذبات مجروح ہوئے ہیں۔ پاکستان نے مطالبہ کیا ہے کہ مقدس مقامات، وہاں موجود عازمین اور شہریوں کی حفاظت کے پیشِ نظر ایسے حملے فوری اور غیر مشروط طور پر روکے جائیں، جو خطے کی سلامتی کے لیے بڑا خطرہ ہیں۔ پاکستان نے سعودی عرب کی خودمختاری، علاقائی سلامتی اور حرمین شریفین کے تقدس کے دفاع کے لیے اپنی غیر متزلزل حمایت کا اعادہ کیا ہے۔