کوئٹہ میں پاکستان کوسٹ گارڈز کی کارروائیاں، 123 غیر قانونی تارکینِ وطن گرفتار

پاکستان کوسٹ گارڈز نے گزشتہ دو ماہ کے دوران بلوچستان کے بارڈر جیوانی کے علاقے میں کارروائیاں کرتے ہوئے 123 غیر قانونی تارکینِ وطن کو گرفتار کر لیا۔

ترجمان پاکستان کوسٹ گارڈز کے مطابق گرفتار افراد بغیر کسی قانونی دستاویزات اور راہداری کے غیر قانونی طریقے سے ایران سے پاکستان اور پاکستان سے ایران سفر کر رہے تھے۔ ابتدائی تفتیش کے بعد تمام افراد کو مزید تفتیش اور دیگر قانونی کارروائیوں کے لیے ایف آئی اے حکام کے حوالے کر دیا گیا ہے۔

ترجمان نے کہا کہ پاکستان کوسٹ گارڈز آئندہ بھی ایسی کارروائیاں تسلسل کے ساتھ جاری رکھے گی تاکہ وطنِ عزیز کو انسانی اسمگلنگ جیسی لعنت سے نجات دلائی جا سکے، اور اس مقصد کے حصول کے لیے تمام دستیاب وسائل کو بھرپور طریقے سے بروئے کار لایا جائے گا۔