غیر ملکی یا دوہری شہریت ظاہر نہ کرنے والے سول سرونٹس کو ایک ہفتے کی مہلت

حکومتِ پاکستان نے تمام سرکاری افسران اور ان کے زیرِ کفالت افراد کے لیے غیر ملکی یا دوہری شہریت کا ڈیکلریشن جمع کرانے کے لیے ایک ہفتے کی حتمی مہلت جاری کر دی ہے۔ اسٹیبلشمنٹ ڈویژن کی جانب سے تمام وفاقی وزارتوں، ڈویژنز، صوبائی چیف سیکرٹریز اور پولیس سربراہان کو بھیجے گئے آفس میمورنڈم میں خبردار کیا گیا ہے کہ مطلوبہ معلومات فراہم نہ کرنے یا غلط بیانی کرنے والے افسران کے خلاف شدید محکمانہ کارروائی کی جائے گی۔

اسٹیبلشمنٹ ڈویژن کے مطابق ‘سول سرونٹس (غیر ملکی اور دوہری شہریت کے انکشاف اور ممانعت) رولز 2026’ کے تحت تمام سول سرونٹس کے لیے اپنے اور اپنے اہل خانہ کے شہریت سٹیٹس، غیر ملکی سفری دستاویزات اور غیر ملکیوں سے شادی سے متعلق تفصیلا ظاہر کرنا لازمی ہے۔ پاکستان ایڈمنسٹریٹو سروس (PAS)، پولیس سروس آف پاکستان (PSP)، سیکرٹریٹ اور آفس مینجمنٹ گروپس کے متعدد افسران نے یکم ستمبر کی ابتدائی ڈیڈ لائن گزرنے کے باوجود تاحال اپنے ڈیکلریشن جمع نہیں کرائے۔ حکام کا کہنا ہے کہ ایک ہفتے کے اندر فارم جمع نہ کرانے کی صورت میں افسران کو ‘مس کنڈکٹ’ کا مرتکب قرار دیتے ہوئے ان کی ملازمت کسی بھی وقت ختم کی جا سکتی ہے۔