پٹرولیم قیمتوں میں کمی کی جائے، پاکستان بزنس فورم کا حکومت سے مطالبہ

پاکستان بزنس فورم نے حکومت سے 14 مارچ سے پٹرولیم مصنوعات کی قیمتوں میں کمی کا مطالبہ کر دیا ہے۔

پاکستان بزنس فورم کے مطابق وزارتِ خزانہ کو چاہیے کہ 390 ارب روپے کے ایمرجنسی فنڈ میں سے سبسڈی فراہم کی جائے تاکہ عوام اور کاروباری طبقے پر بوجھ کم کیا جا سکے۔ بزنس فورم کا کہنا ہے کہ اگر یہ فنڈ استعمال نہیں کیا گیا تو 30 جون کو یہ لیپس ہو جائے گا۔

صدر پاکستان بزنس فورم نے کہا کہ موجودہ پٹرولیم ریٹس عوام اور بزنس کمیونٹی کے لیے ناقابل برداشت ہو چکے ہیں جبکہ خطے میں اس وقت پٹرولیم قیمتوں یا ٹیکسز کے لحاظ سے پاکستان سب سے آگے ہے۔

اعلامیے کے مطابق حکومت ایمرجنسی فنڈ سے فی لیٹر 80 روپے تک کا بوجھ برداشت کرے۔ پاکستان بزنس فورم کا کہنا ہے کہ اس وقت عوام پٹرول 1.15 ڈالر فی لیٹر کے حساب سے خرید رہی ہے، اس لیے قیمت کو ایک ڈالر فی لیٹر مقرر کیا جانا چاہیے۔

فورم کے مطابق آئل ریفائنریز کو ممکنہ نقصان کی صورت میں اسے پی ایس ڈی پی کے ذریعے ایڈجسٹ کیا جا سکتا ہے، جبکہ موجودہ برینٹ قیمتوں پر آئل ریفائنریز کو کوئی نقصان نہیں ہو رہا۔ اعلامیے میں کہا گیا کہ پیٹرولیم لیوی صارفین پر عائد ہوتی ہے، ریفائنریز پر نہیں۔