نئے مالی سال 2026-27 کے بجٹ میں دفاع کیلئے 2665 ارب روپے رکھنے کی تجویز

نئے مالی سال 2026-27 کے وفاقی بجٹ میں دفاع اور ترقیاتی منصوبوں کے لیے بڑے پیمانے پر فنڈز مختص کرنے کی تجویز سامنے آئی ہے۔

ذرائع کے مطابق دفاعی شعبے کے لیے 2665 ارب روپے جبکہ پبلک سیکٹر ڈویلپمنٹ پروگرام کے لیے 1126 ارب روپے رکھنے کی تجویز دی گئی ہے۔

دستاویزات کے مطابق ترقیاتی بجٹ میں سب سے زیادہ حصہ انفراسٹرکچر منصوبوں کو دیا گیا ہے، جن کے لیے 730 ارب روپے مختص کرنے کی تجویز ہے۔

آبی وسائل کے منصوبوں کے لیے 179 ارب روپے جبکہ سماجی شعبے کے ترقیاتی منصوبوں کے لیے 187 ارب 20 کروڑ روپے رکھنے کی تجویز سامنے آئی ہے۔

فزیکل پلاننگ اور ہاؤسنگ کے لیے 45 ارب روپے جبکہ صحت کے شعبے کے لیے 22 ارب روپے مختص کرنے کی تجویز دی گئی ہے۔

تعلیمی شعبے میں مجموعی طور پر 77 ارب روپے سے زائد فنڈز رکھنے کی تجویز ہے، جن میں وفاقی وزارت تعلیم اور ہائر ایجوکیشن کمیشن کے منصوبے شامل ہیں۔