پاکستان بینکنگ سمِٹ 2026ء: ڈیجیٹل بینکنگ اور کیش لیس اکانومی پر فوکس، 14 بین الاقوامی ماہرین شرکت کریں گے، پی بی اے کی پریس کانفرنس

پاکستان بینکس ایسوسی ایشن (PBA) کے زیر اہتمام اسلامک چیمبر آف کامرس اینڈ ڈویلپمنٹ میں ‘پاکستان بینکنگ سمِٹ 2026ء’ کے حوالے سے ایک اہم پریس کانفرنس کا انعقاد کیا گیا۔ اس اہم پریس کانفرنس کی صدارت پی بی اے کے جنرل سیکریٹری منیر کمال نے کی، جبکہ اس موقع پر چیئرمین پی بی اے ظفر مسعود، چیئرمین پاکستان بینکنگ سمِٹ عاطف باجوہ اور اوورسیز انویسٹرز چیمبر آف کامرس کے صدر فیصل حسین بھی موجود تھے۔

پریس کانفرنس سے خطاب کرتے ہوئے جنرل سیکریٹری پی بی اے منیر کمال نے بتایا کہ رواں سال منعقد ہونے والی بینکنگ سمِٹ میں عالمی سطح کے مالیاتی منظرنامے کو مدنظر رکھا گیا ہے۔ اس سمِٹ میں امریکہ، بحرین، دبئی، ملائیشیا، سعودی عرب اور بیلجیئم سمیت دنیا بھر سے 14 ممتاز بین الاقوامی ماہرین شرکت کر رہے ہیں۔ ان کا کہنا تھا کہ اس سمِٹ کا بنیادی مقصد دنیا بھر میں بینکنگ کے شعبے میں ہونے والی جدید تبدیلیوں سے سیکھنا اور انہیں پاکستان میں متعارف کرانا ہے۔

منیر کمال نے سمِٹ کے ایجنڈے پر روشنی ڈالتے ہوئے واضح کیا کہ اس ایونٹ میں زراعت کے شعبے سے لے کر مختلف چھوٹے و بڑے کاروباروں کو قرضے فراہم کرنے کی جدید حکمت عملیوں پر تفصیلی غور و خوض کیا جائے گا۔ اس کے ساتھ ساتھ، پاکستان کو جدید خطوط پر استوار کرنے کے لیے بینکنگ سیکٹر کی ڈیجیٹائزیشن، پیمنٹ سسٹمز کی بہتری اور ملک کو کیش لیس اکانومی (کیش کے بغیر معیشت) کی طرف گامزن کرنے کی حکمت عملیوں پر خصوصی فوکس کیا جائے گا۔