محسن نقوی کی بنگلہ دیشی ہم منصب سے ملاقات، اہم شعبوں میں تعاون بڑھانے پر اتفاق

وفاقی وزیرِ داخلہ محسن نقوی اور ان کے بنگلہ دیشی ہم منصب صلاح الدین احمد کے درمیان ایک اہم ملاقات ہوئی ہے، جس میں دونوں ممالک نے مشترکہ مفادات کے شعبوں میں تعاون کو مزید وسعت دینے پر اتفاق کیا ہے۔ ملاقات کے دوران ایران امریکہ تنازع اور مشرقِ وسطیٰ کی موجودہ سنگین صورتحال پر تفصیلی تبادلہ خیال کیا گیا۔ اس موقع پر دونوں وزرائے داخلہ نے پولیس افسران کی ٹریننگ، ایکسچینج پروگرامز کی بحالی، اور سائبر کرائمز سمیت آن لائن فراڈ کی روک تھام کے لیے باہمی اشتراک بڑھانے کا فیصلہ کیا۔ بنگلہ دیشی وزیرِ داخلہ نے خطے میں قیامِ امن کے لیے پاکستان کے تعمیری کردار کی تعریف کی۔ وزیرِ داخلہ محسن نقوی کا کہنا تھا کہ اللہ تعالیٰ کے فضل و کرم سے وزیراعظم اور فیلڈ مارشل نے امن کے لیے ناقابلِ فراموش کردار ادا کیا ہے، اور اب وقت آ گیا ہے کہ دونوں ممالک باہمی روابط کو مزید مستحکم کرنے کے لیے نئے مواقع سے بھرپور فائدہ اٹھائیں۔