پاکستان کے آٹو سیکٹر کی کارکردگی میں شاندار اضافہ: سہ ماہی منافع 17.7 ارب روپے سے متجاوز،

کراچی: پاکستان اسٹاک ایکسچینج (PSX) میں درج آٹو سیکٹر کی کمپنیوں نے مالی سال 2025-26 کی دوسری سہ ماہی (اکتوبر تا دسمبر) کے دوران غیر معمولی منافع ریکارڈ کیا ہے۔ تازہ ترین مالیاتی رپورٹ کے مطابق، آٹو سیکٹر کا مجموعی منافع سالانہ بنیادوں پر 18.7 فیصد اضافے کے ساتھ 17 ارب 70 کروڑ 30 لاکھ روپے تک پہنچ گیا ہے۔

اس نمایاں ترقی کی بنیادی وجہ موٹر سائیکلوں کی فروخت میں ہونے والا بڑا اضافہ ہے، جو گزشتہ سال کے اسی عرصے کے مقابلے میں 34 فیصد بڑھ کر 4 لاکھ 24 ہزار یونٹس تک جا پہنچی ہے۔ اس کے علاوہ، لسٹڈ کمپنیوں کی مجموعی فروخت 21 ہزار 500 گاڑیوں تک بڑھ گئی ہے۔

رپورٹ کے مطابق، وفاقی حکومت کی آٹو فنانسنگ پالیسی اور حکومتِ پنجاب کی ٹریکٹر اسکیم نے اس شعبے کی بحالی میں کلیدی کردار ادا کیا ہے۔ ٹریکٹرز کی طلب میں اضافے نے مجموعی منافع کو مہمیز دی ہے، جبکہ بہتر کیش پوزیشن کی بدولت کمپنیوں کی دیگر آمدنی (Other Income) میں بھی سالانہ 24.7 فیصد اضافہ دیکھا گیا ہے۔ ماہرین کا کہنا ہے کہ بہتر معاشی اشاریوں اور سرکاری مراعات کی وجہ سے آٹو سیکٹر دوبارہ استحکام کی راہ پر گامزن ہو چکا ہے۔