آپریشن غضب للحق کے دوران قندھار میں 205 کور کا بریگیڈ ہیڈکوارٹر تباہ، سکیورٹی ذرائع

سکیورٹی ذرائع کے مطابق پاک فوج نے فتنہ الخوارج اور افغان طالبان کے ٹھکانوں کے خلاف جاری کارروائیوں میں ایک بڑی کامیابی حاصل کی ہے۔ ’آپریشن غضب للحق‘ کے تحت کی گئی ایک مؤثر فضائی کارروائی میں قندھار میں واقع افغان طالبان کے 205 کور کے بریگیڈ ہیڈکوارٹر کو مکمل طور پر تباہ کر دیا گیا ہے۔

سکیورٹی ذرائع کا کہنا ہے کہ اس بھرپور کارروائی کے دوران نہ صرف ہیڈکوارٹر بلکہ طالبان کے ایک بڑے ایمونیشن ڈپو (اسلحہ خانے) کو بھی نشانہ بنایا گیا، جس کے نتیجے میں انہیں بھاری جانی و مالی نقصان اٹھانا پڑا ہے۔ اس کارروائی کے بعد دہشت گرد عناصر کے سپلائی چین اور آپریشنل نیٹ ورک کو شدید دھچکا پہنچا ہے۔

ذرائع نے مزید واضح کیا کہ ان طاقتور فضائی حملوں کا مقصد دہشت گردوں کی محفوظ پناہ گاہوں کا خاتمہ اور سرحد پار سے ہونے والی دہشت گردی کی لہر کو روکنا ہے۔ ’آپریشن غضب للحق‘ کے تحت پاک فوج نے عزم ظاہر کیا ہے کہ خطے میں امن و امان کے قیام اور ملکی سلامتی کو یقینی بنانے کے لیے دہشت گرد عناصر کے خلاف بلا امتیاز اور سخت کارروائیاں جاری رکھی جائیں گی۔