پاک افغان کشیدگی: پاک فضائیہ نے افغانستان کی متعدد ملٹری تنصیبات تباہ کردیں

سکیورٹی ذرائع کے مطابق پاکستان نے افغان سرحد پر ہونے والی بلااشتعال کارروائیوں کے جواب میں افغانستان میں فضائی حملے شروع کیے، جن میں ننگرہار کے اندر ایک بڑا ایمونیشن ڈیپو تباہ کر دیا گیا۔ حملے کے دوران دیگر اہم علاقوں میں بھی کارروائیاں جاری ہیں۔

ذرائع نے بتایا کہ کابل، قندھار اور پکتیا میں بھی اہم ملٹری تنصیبات کو فضائی حملوں میں نقصان پہنچا۔ کابل میں دو بریگیڈ ہیڈ کوارٹرز تباہ ہوئے، جبکہ قندھار میں ایک کور ہیڈ کوارٹر، ایک بریگیڈ ہیڈ کوارٹر، ایمونیشن ڈیپو اور لاجسٹک بیس کو بھی تباہ کیا گیا۔ پکتیا میں ایک کور ہیڈ کوارٹر پر بھی حملہ کیا گیا۔

سکیورٹی ذرائع کے مطابق پاک افغان سرحد کے قریبی علاقوں میں پاکستانی سکیورٹی فورسز کی کارروائی سے طالبان کے کئی ٹھکانے تباہ ہوئے اور 8 جنگجو ہلاک ہوئے۔ ابتدائی اطلاعات کے مطابق مجموعی طور پر تقریباً 44 طالبان ہلاک ہو چکے ہیں۔