پاکستان میں ایوی ایشن سکیورٹی عالمی معیار سے ہم آہنگ بنانے کیلئے 12 ارب روپے کا منصوبہ

پاکستان میں ایوی ایشن سیکیورٹی کے شعبے کو بین الاقوامی معیار سے ہم آہنگ کرنے کے لیے 12 ارب روپے کا میگا منصوبہ تیار کر لیا گیا ہے۔

ذرائع کے مطابق منصوبے کے پہلے مرحلے کے تحت ملک کے 4 بڑے بین الاقوامی ایئرپورٹس—کراچی، لاہور، اسلام آباد اور پشاور—پر جدید ترین سیکیورٹی آلات اور عالمی معیار کا فول پروف ٹیکنالوجی نظام نصب کیا جائے گا۔ منصوبے میں مسافروں کی تیز تر اور مؤثر سرچنگ کے لیے جدید ہینڈ بیگیج و ہولڈ بیگیج سی ٹی اسکینرز (CT Scanners)، جدید فل باڈی اسکینرز (Full Body Scanners) اور گاڑیوں و کارگو کی جامع اسکیننگ کے لیے ہائی ٹیک سسٹمز کی خریداری شامل ہے۔

اس کے علاوہ منصوبے کے تحت ایوی ایشن سیکیورٹی کے جدید ترین کمیونیکیشن آلات بھی فراہم کیے جائیں گے۔ سول ایوی ایشن ذرائع کا کہنا ہے کہ اس جدت سے ایئرپورٹس پر سیکیورٹی کے استحکام کے ساتھ ساتھ مسافروں کی چیکنگ کا وقت بچے گا، ان کی سہولیات میں اضافہ ہوگا اور ایئرپورٹ آپریشنز کی کارکردگی مزید بہتر ہو سکے گی۔