پاک افغان کشیدگی :چین متحرک، نمائندہ کابل روانہ

چین نے پاکستان اور افغانستان کے درمیان گزشتہ 10 دنوں سے جاری کشیدگی ختم کرانے کے لیے اقدامات شروع کر دیے ہیں۔ اس سلسلے میں چین کے خصوصی نمائندہ برائے افغانستان، یو شیاؤ یونگ، کو کابل بھیج دیا گیا جہاں انہوں نے اتوار کو افغانستان کے وزیر خارجہ ملا امیرخان متقی سے ملاقات کی۔

افغان وزارت خارجہ کے بیان کے مطابق ملاقات میں دونوں رہنماؤں نے دوطرفہ تعاون اور خطے میں خراب ہوتی ہوئی صورتحال پر تبادلہ خیال کیا۔ چینی نمائندے نے افغان حکومت پر زور دیا کہ پاکستان کے ساتھ کشیدگی کو مذاکرات اور سفارتکاری کے ذریعے ختم کیا جائے، کیونکہ دونوں ملکوں کے درمیان کشیدگی کا خاتمہ خطے کے استحکام اور سلامتی کے لیے ضروری ہے۔

یو شیاؤ یونگ نے کہا کہ چین حالات کو بہتر بنانے کے لیے دونوں ملکوں کے ساتھ رابطے میں ہے۔ ان کا یہ دورہ ایسے موقع پر ہوا ہے جب سرحدی جھڑپیں جاری ہیں اور پاکستان نے افغان سرزمین پر دہشت گرد گروپوں کے خلاف کارروائیاں کی ہیں۔ اسلام آباد کے حکام کا کہنا ہے کہ افغان حکومت سرحد پار سے دہشت گردوں کو روکنے میں ناکام رہی ہے۔ طالبان حکومت نے ہمیشہ پاکستان کے اقدامات کو اپنی خودمختاری کی خلاف ورزی قرار دیا ہے۔