پاکستان نے افغانستان میں کسی شہری علاقے کو نشانہ نہیں بنایا: عطاء اللہ تارڑ

وفاقی وزیر اطلاعات عطاء اللہ تارڑ نے کہا ہے کہ پاکستان نے افغانستان میں کسی شہری علاقے کو نشانہ نہیں بنایا اور تمام کارروائیاں دہشت گردوں کے بنیادی ڈھانچے اور معاون نظام کے خلاف درست انٹیلی جنس پر مبنی ہیں۔ غیر ملکی جریدوں سے گفتگو میں انہوں نے کہا کہ افغان طالبان حکومت کی جانب سے پیش کیے جانے والے اعداد و شمار سنجیدہ نہیں اور اقوام متحدہ کی رپورٹیں بھی مکمل طور پر طالبان حکومت پر مبنی ہیں۔

وزیر اطلاعات نے افغان طالبان اور فتنہ الخوارج کے دہشت گردوں کے حملوں کو بھی اس بات کی تصدیق قرار دیا کہ افغان سرزمین پر سرگرم دہشت گرد تنظیموں اور طالبان حکومت کے درمیان رابطہ موجود ہے۔ انہوں نے کہا کہ پاکستان نے دہشت گردوں اور ان کے معاونین بشمول افغان طالبان کے فوجی اڈوں کو فوری اور مؤثر انداز میں نشانہ بنایا اور کسی شہری علاقے کو نقصان نہیں پہنچایا۔