پی ٹی اے کے زیراہتمام پاکستان میں 5 جی سپیکٹرم کی نیلامی کی تقریب

پاکستان ٹیلی کمیونیکیشن اتھارٹی (پی ٹی اے) کے زیراہتمام ملک میں 5 جی سپیکٹرم کی نیلامی کی تقریب اسلام آباد کے ایک مقامی ہوٹل میں جاری ہے۔

تقریب میں وفاقی وزیر خزانہ محمد اورنگزیب، وفاقی وزیر آئی ٹی شزا فاطمہ، وزیر اطلاعات و نشریات عطاء اللہ تارڑ اور دیگر حکام شریک ہیں۔وفاقی وزیر خزانہ محمد اورنگزیب نے تقریب سے خطاب کرتے ہوئے کہا کہ آئی ٹی کے شعبے کے لیے آج کا دن نہایت اہم ہے اور حکومت معیشت کو مستحکم کرنے کے لیے مختلف اقدامات کر رہی ہے۔ انہوں نے کہا کہ علاقائی صورتحال کے پیش نظر توانائی کی بچت کے اقدامات بھی کیے جا رہے ہیں۔ان کا کہنا تھا کہ 5 جی سپیکٹرم کی نیلامی کے لیے حکومت نے مکمل ایکوسسٹم تیار کیا ہے اور اس سے آئی ٹی برآمدات میں اضافہ ہوگا۔ انہوں نے کہا کہ پاکستان بلاک چین اور مصنوعی ذہانت جیسی جدید ٹیکنالوجی کی صنعتوں کی جانب بڑھ رہا ہے۔وفاقی وزیر آئی ٹی شزا فاطمہ نے کہا کہ پاکستان میں پہلی بار 5 جی ٹیکنالوجی متعارف کرائی جا رہی ہے اور آئندہ چار سے پانچ ماہ میں 5 جی انٹرنیٹ سروس کا باضابطہ آغاز متوقع ہے۔ ان کا کہنا تھا کہ تیز رفتار اور جدید انٹرنیٹ کی فراہمی حکومت کی ترجیح ہے اور اس سے ملک کی معاشی ترقی میں تیزی آئے گی۔تقریب کے آغاز پر چیئرمین پی ٹی اے میجر جنرل (ر) حفیظ الرحمان نے کہا کہ آج پاکستان کے لیے ایک تاریخی دن ہے اور ملک میں سپیکٹرم کی دستیابی ایک بڑا چیلنج تھا جسے مختلف اداروں کی مشترکہ کوششوں سے حل کیا گیا۔انہوں نے کہا کہ 5 جی انٹرنیٹ سے ملک کے دور دراز علاقوں میں جدید انٹرنیٹ سہولتیں پہنچ سکیں گی تاہم بجلی کی لوڈشیڈنگ انٹرنیٹ کی فراہمی میں بڑی رکاوٹ ہے۔چیئرمین پی ٹی اے کا کہنا تھا کہ حکومت نے ٹیلی کام انڈسٹری کو سہولت دینے کے لیے رائٹ آف وے چارجز ختم کر دیئے ہیں جو پہلے 36 ہزار روپے فی کلومیٹر تھے اور اب انہیں صفر کر دیا گیا ہے۔