پاکستان کی دوسری فتح، سری لنکا 7 وکٹ سے آؤٹ کلاس

سہ ملکی ٹی ٹوئنٹی سیریز میں پاکستان نے سری لنکا کو 7 وکٹوں سے شکست دے کر ایونٹ میں دوسری کامیابی اپنے نام کرلی۔

راولپنڈی میں کھیلے گئے میچ میں سری لنکا نے ٹاس جیت کر پہلے بیٹنگ کا فیصلہ کیا، تاہم پاکستانی بولرز کے سامنے سری لنکن بیٹنگ لائن مشکلات کا شکار رہی۔ سری لنکا نے مقررہ 20 اوورز میں 7 وکٹوں کے نقصان پر 128 رنز بنائے۔

جینتھ لیاناگے 41 رنز کے ساتھ ناقابلِ شکست رہے، جبکہ کوشل پریرا نے 25 اور کامل مشرا نے 22 رنز اسکور کیے۔
پاکستان کی جانب سے محمد نواز نے شاندار بولنگ کرتے ہوئے تین کھلاڑیوں کو آؤٹ کیا۔ سلمان مرزا، فہیم اشرف اور ابرار احمد نے ایک ایک وکٹ حاصل کی۔

129 رنز کے تعاقب میں پاکستان نے پراعتماد آغاز کیا۔ اوپنر صاحبزادہ فرحان نے شاندار بیٹنگ کا مظاہرہ کرتے ہوئے 80 رنز کی ناقابلِ شکست اننگز کھیلی، جس میں 5 چھکے اور 6 چوکے شامل تھے۔
صائم ایوب نے 20 جبکہ بابر اعظم نے 16 رنز بنائے، اور پاکستان نے ہدف 16ویں اوور میں 3 وکٹوں کے نقصان پر حاصل کرلیا۔

سری لنکا کو اپنے پہلے میچ میں زمبابوے کے ہاتھوں 67 رنز سے شکست ہوئی تھی، جبکہ پاکستان نے اپنے ابتدائی میچ میں زمبابوے کو 5 وکٹوں سے ہرایا تھا۔