نیو یارک اسمبلی میں پاکستانی نژاد کمیونٹی کے اعزاز میں اہم قرارداد منظور، پاک امریکا اقتصادی تعلقات میں اہم پیشرفت

امریکی ریاست نیو یارک میں پاک۔امریکہ اقتصادی تعلقات کے فروغ کے حوالے سے اہم پیش رفت سامنے آئی ہے جہاں ریاستی اسمبلی اور سینیٹ نے پاکستانی۔امریکن بزنس ڈے 2026 منانے کی قرارداد منظور کرلی۔

قرارداد کے تحت 18 مارچ 2026 کو ریاست نیو یارک میں “پاکستانی۔امریکن بزنس جشن ڈے” کے طور پر منایا جائے گا، جس میں پاکستانی۔امریکی کمیونٹی کی نمایاں خدمات کو خراج تحسین پیش کیا گیا ہے۔

قرارداد میں کہا گیا ہے کہ پاکستانی نژاد تاجروں اور کاروباری رہنماؤں نے اقتصادی ترقی، روزگار کے مواقع پیدا کرنے اور نیو یارک کے ثقافتی تنوع کو مضبوط بنانے میں کلیدی کردار ادا کیا ہے۔

ریٹیل، مہمان نوازی، ٹیکنالوجی، مالیات، صحت اور رئیل اسٹیٹ سمیت مختلف اہم شعبوں میں پاکستانی کمیونٹی کی خدمات کو نمایاں طور پر سراہا گیا ہے۔

قرارداد کے متن کے مطابق پاکستانی کمیونٹی دونوں ممالک کے درمیان ایک مضبوط اقتصادی اور ثقافتی پل کا کردار ادا کر رہی ہے، جبکہ پاکستان اور نیو یارک کے درمیان تجارت اور سرمایہ کاری کے فروغ کے مزید مواقع تلاش کرنے پر بھی زور دیا گیا ہے۔

امریکہ میں پاکستان کے سفیر رضوان سعید شیخ اور نیو یارک میں قونصل جنرل احمد اتوزئی نے اسمبلی اجلاس میں خصوصی شرکت کی۔ اس موقع پر سینیٹر جیسیکا راموس نے پاکستانی۔امریکی کمیونٹی کی خدمات کو سراہتے ہوئے کہا کہ نیو یارک کی ترقی میں ان کا کردار ناقابل فراموش ہے۔

سفیر  پاکستان رضوان سعید شیخ کا کہنا تھا کہ یہ قرارداد پاک۔امریکہ اقتصادی تعلقات کے لیے ایک اہم سنگ میل ہے اور اب وقت آگیا ہے کہ ان تعلقات کو عملی اقتصادی نتائج میں تبدیل کیا جائے۔

انہوں نے کہا کہ پاکستان کی نوجوان افرادی قوت، خصوصاً طبی اور تکنیکی شعبوں میں، نیو یارک کی معیشت میں مؤثر کردار ادا کرنے کی صلاحیت رکھتی ہے۔