رائزنگ اسٹارز ایشیا کپ: پاکستان نے یو اے ای کو 9 وکٹوں سے آؤٹ کلاس کردیا

رائزنگ اسٹارز ایشیا کپ میں پاکستان شاہینز نے شاندار کارکردگی دکھاتے ہوئے متحدہ عرب امارات کو 9 وکٹوں سے بآسانی شکست دے دی۔ قومی ٹیم نے 60 رنز کا معمولی ہدف صرف چھٹے اوور میں حاصل کرلیا۔

دوحا میں ہونے والے میچ میں یو اے ای کی ٹیم پاکستان شاہینز کی تباہ کن بولنگ کے سامنے ٹک نہ سکی اور پوری ٹیم 59 رنز پر سمٹ گئی۔
سید حیدر 20 اور محمد فرازدین 12 رنز بنا کر کچھ مزاحمت دکھا سکے۔

پاکستان کی جانب سے سفیان مقیم نے 3 وکٹیں حاصل کیں، جبکہ احمد دانیال اور معاذ صداقت نے 2، 2 شکار کیے۔

ہدف کے تعاقب میں پاکستان شاہینز نے جارحانہ آغاز کیا اور صرف ایک وکٹ کے نقصان پر چھٹے اوور میں میچ اپنے نام کرلیا۔
معاذ صداقت نے 37 رنز کی دھواں دار اننگز کھیلی جبکہ غازی غوری 16 رنز بنا کر ناٹ آؤٹ رہے۔

شاندار آل راؤنڈ کارکردگی پر معاذ صداقت کو پلیئر آف دی میچ کا اعزاز دیا گیا۔