پاک تاجک فیسٹیول، ثقافتی ہم آہنگی کا شاندار مظاہرہ

محکمہ اطلاعات و ثقافت پنجاب کے زیر اہتمام پاک–تاجک فیسٹیول کا انعقاد کیا گیا، جس میں وزیر اطلاعات و ثقافت پنجاب عظمیٰ بخاری نے بطور مہمان خصوصی شرکت کی۔ فیسٹیول میں تاجکستان سے آئے فنکاروں نے روایتی ثقافتی رقص اور پرفارمنس پیش کیں، جبکہ معروف گلوکار راحت فتح علی خان نے اپنی شاندار پرفارمنس سے سماں باندھ دیا۔

72 رکنی تاجک ثقافتی وفد کی قیادت تاجکستان کے سفیر شریف زادہ یوسف نے کی۔ تقریب میں پارلیمانی سیکرٹری برائے اطلاعات پنجاب شازیہ رضوان، سیکرٹری اطلاعات سید طاہر رضا ہمدانی، ایگزیکٹو ڈائریکٹر الحمرا آرٹس کونسل محمد نواز گوندل اور ڈی جی پی آر شیخ فرید احمد بھی موجود تھے۔

تقریب سے خطاب کرتے ہوئے عظمیٰ بخاری نے وزیراعلیٰ پنجاب مریم نواز شریف کی جانب سے تاجک وفد کو خوش آمدید کہا اور کہا کہ پاکستان اور تاجکستان مشترکہ ثقافتی اقدار، روایات اور تہذیبی رشتوں میں گہری مماثلت رکھتے ہیں۔ انہوں نے کہا کہ پاکستان–تاجکستان ثقافتی فیسٹیول نے باہمی روابط کو مزید مضبوط کیا ہے اور پنجاب حکومت ثقافت کے فروغ کے لیے تاجکستان کے ساتھ ہر ممکن تعاون جاری رکھے گی۔

وزیر اطلاعات پنجاب نے تاجک ثقافت کے منفرد رنگ، لباس اور روایات کو سراہتے ہوئے کہا کہ تاجک خواتین کا وقار، حسن اور لباس قابلِ تحسین ہے۔ ان کا کہنا تھا کہ علامہ محمد اقبال کا کلام پاکستان اور تاجکستان کو فکری رشتے میں جوڑتا ہے اور تاجک فنکاروں کی موسیقی و رقص نے دل موہ لیے ہیں۔

تاجکستان کے سفیر شریف زادہ یوسف نے کہا کہ علامہ اقبال کی شاعری اور فکر دونوں ممالک کے عوام کو یک جان کرتی ہے، لاہور آ کر جنت کا سا احساس ہو رہا ہے۔ انہوں نے شاندار فیسٹیول اور یادگار میزبانی پر وزیراعلیٰ پنجاب اور وزیر اطلاعات کا شکریہ ادا کیا۔

بعدازاں وزیر اطلاعات پنجاب نے تاجکستان کے کلچر ڈے کے حوالے سے لگائے گئے مختلف سٹالز کا دورہ کیا اور تاجک ہینڈی کرافٹس کو سراہا۔