پاک بحریہ نے سمندر میں گرنے والے کارگو طیارے کے بلیک باکس کی نشاندہی کر لی

کراچی کے قریب جولائی میں سمندر میں گر کر تباہ ہونے والے کے ٹو ایئرویز (K2 Airways) کے کارگو طیارے کے حادثے کی تحقیقات میں بڑی پیش رفت سامنے آئی ہے۔ پاک بحریہ نے بحیرہ عرب میں 3 ہزار 200 میٹر کی ریکارڈ گہرائی میں طیارے کے بلیک باکس کے دقیق مقام کی نشاندہی کر لی ہے۔ ترجمان پاک بحریہ کے مطابق، زیرِ آب طیارے کے ملبے اور بلیک باکس کی تلاش کے لیے وسیع پیمانے پر سرچ آپریشن گزشتہ دو ماہ سے مسلسل جاری تھا، جسے انتہائی مشکل اور پیچیدہ سمندری حالات میں سرانجام دیا گیا ہے۔

ترجمان کے مطابق بلیک باکس کا سراغ قومی ادارے ‘نیشنل انجینئرنگ اینڈ سائنٹیفک کمیشن’ (NESCOM) کے تیار کردہ جدید اور خصوصی آلات کی مدد سے لگایا گیا۔ پاک بحریہ نے بلیک باکس کی لوکیشن اور اس سے متعلق تمام تکنیکی معلومات ‘بیورو آف ایئر سیفٹی انویسٹی گیشن’ کو فراہم کر دی ہیں تاکہ ریکوری کا مرحلہ شروع کیا جا سکے۔ حکام کے مطابق اتنی شدید گہرائی میں بلیک باکس کی کامیابی سے نشاندہی کرنا پاکستان کی بحری اور سائنسی تاریخ میں اپنی نوعیت کا پہلا اور تاریخی آپریشن ہے۔