افغان طالبان کی سرحد پر بلا اشتعال فائرنگ، پاک فوج کا منہ توڑ جواب، افغان چیک پوسٹ تباہ

پاک افغان سرحد پر طورخم اور تیراہ کے مقامات پر افغان طالبان کی جانب سے بلااشتعال فائرنگ کی گئی، جس کا پاکستانی سکیورٹی فورسز نے فوری اور مؤثر جواب دیا ہے۔ سکیورٹی ذرائع کے مطابق یہ جھڑپیں سرحد کے تین مختلف پوائنٹس پر ہوئیں اور فائرنگ کا تبادلہ تقریباً ایک گھنٹے تک جاری رہا۔ پاک فوج کی بھرپور جوابی کارروائی میں افغان فورسز کی ایک چیک پوسٹ مکمل طور پر تباہ ہوگئی، جبکہ پاکستانی حدود میں تمام جوان محفوظ رہے۔

وزیراعظم شہباز شریف کے ترجمان برائے غیر ملکی میڈیا، مشرف زیدی نے ‘ایکس’ پر جاری بیان میں دوٹوک موقف اختیار کرتے ہوئے کہا کہ کسی بھی مزید اشتعال انگیزی کا فوری اور سخت جواب دیا جائے گا۔ انہوں نے مزید کہا کہ پاکستان اپنے شہریوں کے تحفظ اور اپنی علاقائی سالمیت کے دفاع کے لیے پرعزم ہے۔ فی الوقت سرحدی علاقوں میں صورتحال پر کڑی نظر رکھی جا رہی ہے۔