ہماری لیڈر شپ کو سات کیسوں میں سزا ہوئی ہے,بیرسٹر گوہر علی

تحریک تحفظ آئین کانفرنس کے پہلے روز چیئرمین تحریک انصاف بیرسٹر گوہر علی خان نے خطاب کرتے ہوئے کہا کہ پارٹی کی قیادت کو سات مختلف کیسوں میں سزائیں دی جا چکی ہیں اور عوام یہ سوال کر رہے ہیں کہ خان کب باہر آئیں گے۔

بیرسٹر گوہر علی خان نے مشکل وقت میں ساتھ دینے پر محمود خان اچکزئی اور علامہ ناصر عباس کا شکریہ ادا کیا۔ انہوں نے کہا کہ حکومت کی جانب سے تحریری یقین دہانی مانگی گئی، تاہم ہم نے مؤقف اختیار کیا کہ بانی پی ٹی آئی سے مشاورت کے بعد ہی کوئی تحریری جواب دیا جائے گا۔

انہوں نے کہا کہ اگر مولانا فضل الرحمان یہ کہتے ہیں کہ خیبرپختونخوا میں ہمارا مینڈیٹ درست نہیں تو ہم ان کے ساتھ بیٹھ کر بات کرنے کو تیار ہیں۔ ان کا کہنا تھا کہ ملک میں 175 سیاسی جماعتیں رجسٹرڈ ہیں لیکن پارلیمان میں صرف 14 جماعتیں موجود ہیں۔

بیرسٹر گوہر نے کہا کہ اس وقت آزادی سے ملاقات کے حق پر بھی قدغنیں لگائی جا رہی ہیں۔ انہوں نے بشریٰ بی بی کو دی گئی سزا پر سوال اٹھاتے ہوئے کہا کہ ان کا توشہ خانہ سے کوئی تعلق نہیں تھا اور یہ سزا بانی پی ٹی آئی پر دباؤ ڈالنے کیلئے دی گئی ہے۔

انہوں نے مزید کہا کہ اگر ہم نے اقدامات اٹھائے تو باہر جانے والے ججز واپس آ جائیں گے اور 26 ویں اور 27 ویں آئینی ترامیم واپس ہوں گی۔ بیرسٹر گوہر کے مطابق تحریک انصاف نے 180 نشستیں جیتی تھیں لیکن 91 نشستوں کے ساتھ اسمبلی میں بیٹھنا پڑا، اس کے باوجود بھی پارٹی کے مینڈیٹ کو تسلیم نہیں کیا گیا۔

آخر میں انہوں نے کہا کہ کانفرنس میں جو بھی فیصلے کیے جائیں گے، تحریک انصاف ان کے ساتھ کھڑی ہوگی۔