روشنی سے دماغی خلیوں کو کنٹرول کرنے والی تحقیق پر 3 سائنس دانوں کو نوبیل انعام

سال 2026ء کا نوبیل انعام برائے طب (Physiology or Medicine) روشنی کے ذریعے دماغی خلیوں کی سرگرمی کو کنٹرول کرنے والی ٹیکنالوجی ‘آپٹوجنیٹکس’ (Optogenetics) تیار کرنے والے تین نامور سائنس دانوں کے نام کر دیا گیا ہے۔ سویڈن کے نوبیل اسمبلی نے اعلان کیا کہ امریکا کے کارل ڈائسراتھ (Karl Deisseroth) اور جرمنی کے پیٹر ہیگمین (Peter Hegemann) اور جارج ناگل (Georg Nagel) کو مشترکہ طور پر اس عظیم الشان اعزاز کا حقدار قرار دیا گیا ہے۔

نوبیل کمیٹی کے مطابق اس انقلابی ٹیکنالوجی کی بدولت زندہ دماغ کے اندر انفرادی عصبی خلیوں (Brain Cells/Neurons) کو روشنی کی مدد سے فعال یا غیر فعال کرنا ممکن ہوا، جس سے سائنس دانوں کو یہ سمجھنے میں بے مثال پیش رفت حاصل ہوئی ہے کہ دماغ معلومات کیسے پروسیس کرتا ہے۔ اس تحقیق کی بنیاد 1990ء کی دہائی میں ہیگمین اور ناگل کی جانب سے روشنی کے لیے حساس پروٹینز کی دریافت تھی، جسے بعد میں کارل ڈائسراتھ نے چوہوں کے عصبی خلیوں پر استعمال کر کے عملی شکل دی۔ اس وقت آپٹوجنیٹکس کے ذریعے شیزوفرینیا، الزائمر، پارکنسنز، مرگی اور ذہنی ڈپریشن جیسے پیچیدہ امراض کا علاج تلاش کرنے کے ساتھ بینائی بحال کرنے کے تجربات کیے جا رہے ہیں۔ تینوں سائنس دانوں کو 12 ملین سویڈش کرونا (Swedish Krona) کی انعامی رقم بھی مشترکہ طور پر دی جائے گی