اپوزیشن اتحاد مذاکرات کے لیے تیار، نئے چیف الیکشن کمشنر کی فوری تقرری کا مطالبہ

اپوزیشن اتحاد، تحریک تحفظ آئین پاکستان، نے نئے چیف الیکشن کمشنر کی فوری تقرری کا مطالبہ کر دیا ہے۔ اپوزیشن اتحاد کی جانب سے جاری ہونے والے مشترکہ اعلامیے میں 2024 کے عام انتخابات میں مبینہ دھاندلی کی تحقیقات کروانے اور نئے صاف شفاف انتخابات کے انعقاد کا بھی مطالبہ کیا گیا ہے۔

اعلامیے میں کہا گیا کہ جمہوریت کی عمارت شفاف انتخابات پر کھڑی ہے، اور ہم نئے چیف الیکشن کمشنر کی تقرری چاہتے ہیں۔ اپوزیشن اتحاد نے مذاکرات کے لیے اپنی تیاری کا بھی اعلان کیا۔

اعلامیے میں مزید کہا گیا کہ بانی پاکستان تحریک انصاف اور ان کی اہلیہ سے ملاقاتوں پر عائد پابندی اور پیکا کے کالے قوانین ختم کیے جائیں، ملک میں بڑھتی ہوئی مہنگائی اور ٹیکسز میں کمی کی جائے۔ حکومت سے یہ بھی مطالبہ کیا گیا کہ خیبرپختونخوا میں ہونے والے امن جرگے کے متفقہ لائحہ عمل پر عمل درآمد کیا جائے اور صوبے کو این ایف سی میں اس کا حصہ دیا جائے۔

اپوزیشن اتحاد نے اسٹوڈنٹس یونین پر عائد پابندی ختم کرنے کا بھی مطالبہ کیا اور اعلان کیا کہ صوبائی ہیڈ کوارٹرز میں مشاورتی کانفرنسز کا انعقاد کیا جائے گا تاکہ عوامی مسائل اور صوبائی معاملات پر بھرپور تبادلہ خیال ممکن ہو۔