فورسز نے خاران میں دہشت گردوں کی جانب سے ناکہ بندی کی کوشش ناکام بنا دی

کوئٹہ/خاران: سیکیورٹی فورسز نے بلوچستان کے ضلع خاران میں آپریشن ‘ردالفتنہ 3’ کے تحت کارروائی کرتے ہوئے دہشت گردوں کی جانب سے سڑک کی ناکہ بندی کی کوشش کو کامیابی سے ناکام بنا دیا ہے۔سیکیورٹی ذرائع کے مطابق، سیکیورٹی فورسز نے موقع پر بروقت اقدام کرتے ہوئے ‘فتنہ الہندوستان’ سے تعلق رکھنے والے دہشت گردوں کو گھیر لیا اور ان کے فرار کے تمام راستے مسدود کر دیے ہیں۔ علاقے کو مکمل طور پر محاصرے میں لے کر مختلف مقامات پر سرچ اینڈ کلیئرنس آپریشن شروع کر دیا گیا ہے۔سیکیورٹی حکام کا کہنا ہے کہ فورسز کے دستے علاقے میں پیش قدمی کر رہے ہیں اور آپریشن کا مقصد دہشت گرد عناصر کا مکمل خاتمہ کرنا ہے۔حکام نے اس عزم کا اعادہ کیا ہے کہ سیکیورٹی فورسز بلوچستان میں امن و امان کے قیام اور دہشت گردی کے ناسور کو جڑ سے اکھاڑ پھینکنے کے لیے اپنی کارروائیاں بلا تعطل جاری رکھیں گی۔