ملکی وسائل کی تلاش میں بڑی کامیابی؛ پاکستان نے تیل و گیس کے 11 آنشور بلاکس ایوارڈ کر دیے

وفاقی وزیر پیٹرولیم علی پرویز ملک کی موجودگی میں پاکستان نے مقامی سطح پر تیل و گیس کی تلاش کے لیے 11 آنشور بلاکس ایوارڈ کرنے کے معاہدوں پر دستخط کر دیے ہیں۔ ان معاہدوں کے تحت اگلے تین سالوں میں 8.66 ارب روپے کی سرمایہ کاری کی جائے گی جبکہ 276 ملین روپے متاثرہ علاقوں کی سماجی بہبود پر خرچ ہوں گے۔ یہ بلاکس او جی ڈی سی ایل، پی پی ایل، ماری انرجی، پاکستان آئل فیلڈز اور پرائم گلوبل انرجی کو دیے گئے ہیں۔ وفاقی وزیر کا کہنا تھا کہ یہ قدم پاکستان کے اپ اسٹریم سیکٹر پر سرمایہ کاروں کے اعتماد کی عکاسی کرتا ہے اور اس سے ملک میں روزگار کے نئے مواقع پیدا ہوں گے۔