او جی ڈی سی ایل کی بڑی کامیابی: کوہاٹ کے نشپا بلاک میں تیل و گیس کے نئے ذخائر دریافت

آئل اینڈ گیس ڈویلپمنٹ کمپنی لمیٹڈ (او جی ڈی سی ایل) نے خیبر پختونخوا کے ضلع کوہاٹ میں تیل اور گیس کی نئی دریافت کا اعلان کیا ہے۔ ترجمان او جی ڈی سی ایل کے مطابق یہ کامیابی نشپا بلاک میں واقع ‘براگزئی ایکس 1’ کنویں سے حاصل ہوئی ہے۔

تفصیلات کے مطابق، اس نئے کنویں سے یومیہ 225 بیرل خام تیل اور 10 لاکھ معکب فٹ (MMCFD) گیس حاصل ہونے کا تخمینہ لگایا گیا ہے۔ ترجمان نے مزید بتایا کہ براگزئی ایکس 1 کنویں کی کھدائی کا آغاز 30 دسمبر 2024 کو کیا گیا تھا اور مقررہ اہداف کے حصول کے لیے 5,170 میٹر گہرائی تک ڈرلنگ مکمل کی گئی۔

ماہرین کا کہنا ہے کہ کوہاٹ میں ہونے والی یہ نئی دریافت ملک میں جاری توانائی کے بحران پر قابو پانے اور مقامی وسائل کے ذریعے ملکی طلب پوری کرنے میں معاون ثابت ہوگی۔ اس دریافت سے نہ صرف ملکی زرمبادلہ کی بچت ہوگی بلکہ صوبہ خیبر پختونخوا میں توانائی کے شعبے کو مزید استحکام ملے گا۔