بھارت میں چارٹرڈ طیارہ گر کر تباہ، پائلٹ سمیت 6 زخمی

بھارت کے اوڈیشہ میں ایک اور طیارہ گر کر تباہ ہو گیا۔ حادثے کا شکار 9 سیٹوں والا چارٹرڈ طیارہ پائلٹ سمیت 6 افراد کو لے کر بھونیشور سے راؤرکیلا جا رہا تھا۔

میڈیا رپورٹس کے مطابق طیارہ لینڈنگ کے دوران اچانک حادثے کا شکار ہوا اور راؤرکیلا کے رگھوناتھ پلی علاقے میں جالدا اے بلاک کے قریب گر گیا۔

فوری کارروائی کے نتیجے میں طیارے میں سوار تمام افراد کو محفوظ طور پر نکال لیا گیا۔ زخمی ہونے والوں میں 4 مسافر اور 2 پائلٹ شامل ہیں، جنہیں فوری طور پر قریبی اسپتال منتقل کر کے علاج فراہم کیا گیا۔

حادثے کے بعد سامنے آنے والی تصاویر میں طیارے کے اگلے حصے کی شدید تباہی اور ٹوٹے ہوئے پنکھوں کے آثار واضح ہیں۔ بھارتی فائر ڈپارٹمنٹ کے مطابق طیارہ تقریباً 4 سے 5 کلومیٹر پرواز کے بعد تکنیکی خرابی کی وجہ سے ایمرجنسی لینڈنگ کرنے پر مجبور ہوا۔

حکام نے کہا ہے کہ حادثے کی اصل وجہ جانچ کے لیے تحقیقات شروع کر دی گئی ہیں تاکہ واقعے کے پس منظر کو واضح کیا جا سکے۔