نیو یارک کے نو منتخب میئر زہران ممدانی آج اپنے عہدے کا حلف اٹھائیں گے

نیو یارک کے نو منتخب میئر زہران ممدانی آج یکم جنوری 2026 کو اپنے عہدے کا حلف اٹھائیں گے۔ زہران ممدانی نیو یارک سٹی کی تاریخ میں پہلے میئر ہوں گے جو قرآنِ کریم پر حلف لیں گے۔

حلف برداری کی تقریب میں معروف امریکی سینیٹر برنی سینڈرز زہران ممدانی سے حلف لیں گے، جبکہ موجودہ میئر ایرک ایڈمز نے بھی تقریب میں شرکت کی تصدیق کر دی ہے۔ اس موقع پر متعدد ارکانِ کانگریس اور دیگر اہم سیاسی و سماجی شخصیات کی شرکت متوقع ہے۔

ایشیائی نژاد زہران ممدانی رواں سال نومبر کے اوائل میں نیو یارک سٹی کے میئر منتخب ہوئے تھے۔ انہوں نے صدارتی حمایت کے باوجود آزاد امیدوار اینڈریو کومو کو شکست دے کر ایک بڑی سیاسی کامیابی حاصل کی۔

امریکی میڈیا کے مطابق نیو یارک کے میئر کے انتخابات میں نئی تاریخ رقم ہوئی، جہاں 2001 کے بعد سب سے زیادہ ووٹر ٹرن آؤٹ ریکارڈ کیا گیا، جو عوامی دلچسپی اور سیاسی شعور کا مظہر قرار دیا جا رہا ہے۔