کراچی میں گاڑی میں سوار افراد کی فیملی سے بدتمیزی، وحشیانہ تشدد

کراچی کے علاقے نارتھ کراچی میں ڈبل کیبن گاڑی (ڈالے) میں سوار بااثر افراد کی جانب سے ہرزہ سرائی، فیملی کے سامنے بدتمیزی اور ایک شہری کو بہیمانہ تشدد کا نشانہ بنانے کا انتہائی افسوسناک واقعہ سامنے آیا ہے، جس کی ویڈیو بھی سوشل میڈیا پر وائرل ہو رہی ہے۔

گاڑی میں سوار ان افراد نے بیوی اور معصوم بچوں کے سامنے کار ڈیلر کو روڈ پر مبینہ طور پر شدید تشدد کا نشانہ بنایا۔ اس لرزہ خیز واقعے کا مقدمہ سر سید تھانے میں متاثرہ شہری عبد المتین کی مدعیت میں باضابطہ طور پر درج کر لیا گیا ہے۔ ایف آئی آر کے متن کے مطابق، مدعی مقدمہ عبد المتین اپنی فیملی کے ہمراہ اپنی کار پر سوار ہو کر گھر واپس جا رہے تھے کہ راستے میں ڈبل کیبن ڈالے میں سوار نامعلوم اور بااثر افراد نے ان کی گاڑی زبردستی رکوائی اور باہر نکال کر ان پر تشدد شروع کر دیا۔ متاثرہ شہری کا کہنا ہے کہ وہ تشدد کرنے والے ان افراد کو اچھی طرح پہچانتے ہیں اور یہ تمام ملزمان ان ہی کے علاقے کے رہائشی ہیں۔

متاثرہ شہری نے انتہائی دلخراش انکشاف کرتے ہوئے بتایا کہ ملزمان نے نہ صرف ان پر ہاتھ اٹھایا بلکہ دورانِ تشدد ان کی اہلیہ کا دوپٹہ بھی کھینچا، جس سے فیملی شدید صدمے سے دوچار ہوئی، جبکہ ان کا چھوٹا بیٹا بھی والد پر تشدد اور اس خوفناک منظر کو دیکھ کر بری طرح ڈر گیا۔ واقعے کی اطلاع ملتے ہی پولیس نے فوری طور پر حرکت میں آتے ہوئے متاثرہ شہری کی مدعیت میں مقدمہ درج کر لیا ہے اور ملزمان کی گرفتاری کے لیے چھاپے مار کر ان کی تلاش شروع کر دی ہے۔