نورا فتحی کی کار کا خوفناک حادثہ، نشے میں دھت ڈرائیور فرار؛ اداکارہ اسپتال منتقل

بھارت کی عالمی شہرت یافتہ ڈانسر اور اداکارہ نورا فتحی ایک خوفناک ٹریفک حادثے کا شکار ہو گئی ہیں، جس کے بعد ان کے مداحوں میں شدید تشویش پائی جا رہی ہے۔

بھارتی میڈیا کے مطابق حادثہ اس وقت پیش آیا جب نورا فتحی اپنی ٹیم کے ہمراہ امریکا میں مشہور ڈی جے ڈیوڈ گوئٹا کے کنسرٹ میں شرکت کے لیے روانہ ہو رہی تھیں۔ اسی دوران تیز رفتار گاڑی نے ان کی کار کو زور دار ٹکر مار دی، جس کے نتیجے میں گاڑی ایک سائیڈ سے بری طرح تباہ ہو گئی۔

رپورٹ کے مطابق نورا فتحی پچھلی نشست پر بیٹھی تھیں اور اچانک تصادم کے باعث ان کا سر اگلی سیٹ سے ٹکرا گیا، جس سے وہ شدید زخمی ہو گئیں۔ انہیں فوری طور پر خون میں لت پت حالت میں اسپتال کی ایمرجنسی منتقل کیا گیا۔

ابتدائی تشخیص کے مطابق نورا فتحی کے سر میں چوٹیں آئی ہیں اور ڈاکٹروں نے ان کا سی ٹی اسکین کیا۔ طبی ماہرین نے تصدیق کی کہ اداکارہ کے دماغ کو شدید اندرونی جھٹکا لگا ہے اور انہیں مکمل آرام کا مشورہ دیا گیا۔

حادثے کے بعد سامنے آنے والی اطلاعات کے مطابق حادثے کا ذمہ دار نشے میں دھت ڈرائیور موقع سے فرار ہو گیا، جس کی تلاش جاری ہے۔

تاہم حیران کن طور پر نورا فتحی نے ڈاکٹروں کے سخت آرام کے مشورے کے باوجود اسپتال سے ڈسچارج ہو کر سیدھا کنسرٹ میں جانے کا فیصلہ کیا اور اسی حالت میں سن برن فیسٹیول 2025 کے اسٹیج پر پرفارم کیا۔

نورا فتحی کی اس پیشہ ورانہ وابستگی اور جرات پر مداحوں نے انہیں ’آئرن لیڈی‘ کا خطاب دیا۔ حادثے میں تباہ ہونے والی گاڑی کی تصاویر بھی سوشل میڈیا پر وائرل ہو چکی ہیں، جنہیں دیکھ کر اندازہ لگایا جا سکتا ہے کہ ذرا سی تاخیر معاملے کو مزید سنگین بنا سکتی تھی۔

خیال رہے کہ رواں برس نورا فتحی کے لیے کامیابیوں کا سنہرا دور ثابت ہو رہا ہے۔ وہ امریکا کے معروف جمی فالن شو میں بھی اپنی پرفارمنس سے دھوم مچا چکی ہیں، جبکہ اداکاری کے میدان میں ساؤتھ انڈین فلموں ’کنچنا 4‘ اور ’کے ڈی: دی ڈیول‘ میں اپنی موجودگی کا احساس دلا چکی ہیں۔ اس کے علاوہ ان کی نئی ویب سیریز ’دی رائلز‘ بھی ناظرین کی توجہ حاصل کرنے میں کامیاب رہی ہے۔