عوامی عہدیدار کا حجاب ہٹانا ‘عزت اور شناخت پر حملہ ہے’: ایمنسٹی انٹرنیشنل  شدید مذمت 

نئی دہلی: بھارتی ریاست بہار کے وزیر اعلیٰ نتیش کمار اس وقت شدید تنقید کی زد میں ہیں جب انہوں نے ایک تقریب کے دوران ایک مسلمان خاتون ڈاکٹر کا نقاب کھینچ دیا۔ اس واقعے پر انسانی حقوق کی عالمی تنظیم ایمنسٹی انٹرنیشنل انڈیا نے سخت ردعمل کا اظہار کیا ہے۔

ایمنسٹی انٹرنیشنل انڈیا نے اپنے ایک بیان میں کہا ہے کہ کسی بھی عوامی عہدیدار کی جانب سے حجاب کو زبردستی ہٹانا دراصل اس عورت کی عزت، شناخت اور انفرادی خودمختاری پر سنگین حملہ ہے۔ تنظیم نے مزید کہا کہ ایسے اقدامات معاشرے میں عدم تحفظ اور خوف کو بڑھانے کا سبب بنتے ہیں۔

دوسری جانب، بھارت میں انسانی حقوق کے سرکردہ رہنماؤں نے اس واقعے پر گہری تشویش کا اظہار کرتے ہوئے کہا ہے کہ اس سے بھارت میں اقلیتی خواتین کے تحفظ پر سنگین سوالات کھڑے ہو گئے ہیں۔ رہنماؤں نے واقعے میں ملوث ذمہ داروں کے خلاف فوری اور شفاف قانونی کارروائی کا مطالبہ کیا ہے۔

یاد رہے کہ گزشتہ روز بہار کے دارالحکومت پٹنہ میں منعقدہ ایک تقریب کے دوران، جہاں بی جے پی کے اتحادی نتیش کمار موجود تھے، انہوں نے اپائنٹمنٹ لیٹر لینے آئی ایک مسلمان خاتون ڈاکٹر کا نقاب کھینچ دیا تھا۔

اس ہتک آمیز عمل کے بعد اپوزیشن پارٹی کانگریس سمیت دیگر حلقوں کی جانب سے نتیش کمار کے خلاف ہراسمنٹ کا مقدمہ درج کرنے کا مطالبہ زور پکڑ گیا ہے۔ کانگریس نے اس واقعے کو ‘ناقابلِ معافی بدتمیزی’ قرار دیتے ہوئے کہا کہ “نتیش کمار کی بے شرمی دیکھیں، اپائنٹمنٹ لیٹر لینے آئی خاتون ڈاکٹر کا حجاب اتار دیا۔”