نیو یارک ایئرپورٹ پر مسافر طیارہ فائر بریگیڈکی گاڑی سے ٹکرا گیا، 2 پائلٹ ہلاک، متعدد زخمی

امریکی شہر نیو یارک کے مصروف لاگارڈیا ہوائی اڈے پر مسافر طیارہ فائر بریگیڈکی گاڑی سے ٹکرا گیا، جس کے نتیجے میں دو پائلٹ ہلاک جبکہ درجنوں افراد زخمی ہو گئے۔

پورٹ اتھارٹی کی ایگزیکٹو ڈائریکٹر کیتھرن گارسیا کے مطابق طیارے میں سوار 41 افراد کو ہسپتال منتقل کیا گیا، جن میں سے 32 کو ابتدائی طبی امداد کے بعد فارغ کر دیا گیا جبکہ دیگر زخمیوں کو مختلف نوعیت کی چوٹیں آئی ہیں۔

حکام کے مطابق یہ طیارہ کینیڈا کے شہر مانٹریال سے آ رہا تھا اور لینڈنگ کے دوران ہوائی اڈے پر موجود فائر ٹرک سے ٹکرا گیا۔ متعلقہ فائر گاڑی ایک الگ ہنگامی اطلاع پر موقع پر موجود تھی۔ حادثے کے باعث طیارے کو شدید نقصان پہنچا اور اس کا اگلا حصہ تباہ ہو گیا۔

حکام نے بتایا کہ واقعے کے بعد ہوائی اڈے کو عارضی طور پر بند کر دیا گیا اور پروازوں کی آمد و رفت معطل ہو گئی، جبکہ متعدد پروازیں منسوخ یا تاخیر کا شکار ہوئیں۔

کیتھرن گارسیا کا کہنا ہے کہ حادثے کی وجوہات جاننے کے لیے تحقیقات کا آغاز کر دیا گیا ہے، جس میں تمام پہلوؤں کا جائزہ لیا جائے گا۔