نیویارک: پین اسٹیشن پر چاقو حملہ، 5 افراد زخمی، ملزم گرفتار

امریکی شہر نیویارک کے مصروف ترین ریلوے مرکز پین اسٹیشن پر چاقو حملے کے نتیجے میں 5 افراد زخمی ہوگئے جبکہ پولیس نے ملزم کو گرفتار کرلیا۔

امریکی میڈیا کے مطابق واقعہ اتوار کی شام پیش آیا جب ایک شخص نے پین اسٹیشن پر موجود متعدد افراد پر چاقو سے حملہ کردیا۔ حکام کا کہنا ہے کہ حملے میں زخمی ہونے والے پانچوں افراد کو طبی امداد فراہم کی گئی ہے اور خوش قسمتی سے کسی بھی زخمی کی حالت تشویشناک نہیں۔

رپورٹس کے مطابق گرفتار ملزم کی عمر پچاس برس کے لگ بھگ ہے اور بتایا جارہا ہے کہ وہ بے گھر افراد میں شامل تھا۔ واقعے کے فوراً بعد قانون نافذ کرنے والے اداروں نے کارروائی کرتے ہوئے ملزم کو حراست میں لے لیا۔

نیویارک کے میئر ظہران ممدانی نے واقعے پر افسوس کا اظہار کرتے ہوئے زخمیوں اور ان کے اہل خانہ سے ہمدردی کا اظہار کیا۔ اپنے بیان میں انہوں نے کہا کہ اس افسوسناک واقعے سے متاثر ہونے والے تمام افراد کی جلد صحت یابی کے لیے دعاگو ہیں۔

میئر نے فوری کارروائی پر ایم ٹریک پولیس اور دیگر امدادی اداروں کو خراج تحسین پیش کرتے ہوئے کہا کہ اہلکاروں نے بروقت کارروائی کرکے ملزم کو گرفتار کیا اور زخمیوں کو فوری طبی امداد فراہم کی۔

حکام کے مطابق واقعے کے باوجود ریلوے سروس معمول کے مطابق جاری ہے اور ٹرینوں کی آمدورفت متاثر نہیں ہوئی۔

یہ واقعہ ایسے وقت پیش آیا ہے جب پین اسٹیشن کے اوپر واقع میڈیسن اسکوائر گارڈن میں باسکٹ بال فائنل کے تیسرے مقابلے کی تیاریاں جاری ہیں، جس میں امریکی صدر ڈونلڈ ٹرمپ کی شرکت بھی متوقع ہے۔ سیکیورٹی انتظامات کے باعث علاقے میں حفاظتی اقدامات مزید سخت کر دیے گئے ہیں۔