امریکی ریاست نیوجرسی میں دو ہیلی کاپٹر ٹکراگئے، ایک شخص ہلاک، ایک شدید زخمی

امریکی ریاست نیوجرسی میں دو ہیلی کاپٹر آپس میں ٹکرا گئے، جس کے نتیجے میں ایک شخص ہلاک جبکہ ایک شدید زخمی ہو گیا۔

ہیمونٹن پولیس ڈیپارٹمنٹ کے مطابق حادثہ بیسن روڈ کے علاقے میں پیش آیا، جہاں دورانِ پرواز دو ہیلی کاپٹروں کے درمیان تصادم ہوا۔ ٹکر کے بعد ایک ہیلی کاپٹر میں آگ بھڑک اٹھی جس نے صورتحال کو مزید سنگین بنا دیا۔

پولیس حکام نے حادثے میں ایک شخص کی ہلاکت کی تصدیق کرتے ہوئے بتایا کہ شدید زخمی ہونے والے شخص کو فوری طور پر اسپتال منتقل کر دیا گیا ہے، جہاں اس کی حالت تشویشناک بتائی جا رہی ہے۔

رپورٹ کے مطابق حادثے کا شکار ہونے والے ہیلی کاپٹر میں پائلٹ کے علاوہ کوئی اور سوار موجود نہیں تھا۔

امریکی میڈیا کے مطابق ابتدائی طور پر حادثے کی وجہ معلوم نہیں ہو سکی، تاہم متعلقہ حکام نے واقعے کی تحقیقات کا آغاز کر دیا ہے۔