نیٹ میٹرنگ پالیسی پر فوری نظرثانی ہونی چاہیے، عابد شیر علی کا اپنی ہی حکومت سے مطالبہ

رہنما مسلم لیگ (ن) عابد شیر علی نے نیٹ میٹرنگ پالیسی پر نظرثانی کا مطالبہ کر دیا ہے۔ نجی ٹی وی سے گفتگو کرتے ہوئے انہوں نے کہا کہ یہ فیصلہ درست نہیں اور عوام میں غصہ پایا جاتا ہے۔ ان کا کہنا تھا کہ پارلیمان میں اس معاملے پر بحث ہونی چاہیے تھی۔

عابد شیر علی نے کہا کہ اتفاق رائے سے پالیسی بنائی جاتی اور اس پر عمل کیا جاتا، بصورت دیگر نتائج سنگین ہو سکتے ہیں۔

دوسری جانب سینیٹ کے اجلاس میں وفاقی وزیر توانائی سردار اویس لغاری نے سولر نیٹ میٹرنگ سے متعلق نیپرا کے فیصلے کا کامیاب دفاع کیا۔ ایوان نے پی ٹی آئی سینیٹر زرقا سہروردی کی قرارداد کثرت رائے سے مسترد کر دی۔

وزیر توانائی نے کہا کہ پی ٹی آئی کے دور میں بجلی کی قیمت میں اضافہ ہوا تھا، جسے سنبھالنے کی کوشش کی جا رہی ہے۔ نیپرا نے نیٹ میٹرنگ ریگولیشنز میں تبدیلی کے ذریعے کسی صارف کے معاہدے کی شق کو واپس نہیں لیا۔