نیٹ میٹرنگ کا خاتمہ عوام دشمن پالیسی ہے، حافظ نعیم الرحمان کا سخت درعمل

کراچی: جماعت اسلامی کے امیر حافظ نعیم الرحمان نے حکومت کے نیٹ میٹرنگ کے خاتمے کے فیصلے کو عوام دشمن قرار دیتے ہوئے شدید تنقید کی ہے۔ ان کا کہنا ہے کہ یہ فیصلہ عوام کو دھوکا دینے اور آئی پی پی مافیا کی حمایت کرنے کے لیے کیا گیا ہے، جس سے عوام کا حق سستی بجلی سے محروم ہو جائے گا۔

حافظ نعیم الرحمان نے وضاحت کرتے ہوئے کہا کہ اب سولر صارفین اپنی پیدا کردہ بجلی سستے داموں فروخت کرنے پر مجبور ہوں گے جبکہ اپنی روزمرہ کی بجلی مہنگے ٹیرف پر خریدنی پڑے گی، جو کہ واضح معاشی دہشت گردی کے مترادف ہے۔

انہوں نے مزید کہا کہ پاور سیکٹر میں حکومت کی تمام پالیسیاں ناکام ہو چکی ہیں اور اب ان کا سارا بوجھ عام شہریوں پر منتقل کیا جا رہا ہے۔ جماعت اسلامی حکومت اور نیپرا کے اس فیصلے کو سختی سے مسترد کرتی ہے اور عوامی مفاد میں اس کے فوری ازالے کا مطالبہ کرتی ہے۔