یکم جنوری سے بجلی کا نیا ٹیرف 27.30 روپے فی یونٹ کرنے کی تجویز

ملک میں یکم جنوری 2027ء سے بجلی کا نیا بنیادی ٹیرف 27 روپے 30 پیسے فی یونٹ مقرر ہونے کا قوی امکان ہے، جس کے باعث آنے والے نئے سال میں بھی صارفین پر مہنگی بجلی کا اضافی بوجھ برقرار رہے گا۔

سینٹرل پاور پرچیزنگ ایجنسی (CPPA) نے سال 2027ء کے لیے بجلی کی خریداری کا پلان نیشنل الیکٹرک پاور ریگولیٹری اتھارٹی (NEPRA) میں جمع کرا دیا ہے۔ سی پی پی اے کی درخواست کے مطابق سال 2027ء کے لیے بجلی کی خریداری کی مجموعی لاگت کا تخمینہ 3 ہزار 439 ارب روپے لگایا گیا ہے، جس میں سے 1,914 ارب روپے صرف کیپسیٹی پیمنٹس (Capacity Payments) کی مد میں ادا کیے جائیں گے۔ اس کے علاوہ فیول کاسٹ کی مد میں 12 سو ارب روپے سے زائد، ٹرانسمیشن چارجز کے لیے 248 ارب سے زائد اور آپریشن اینڈ مینٹیننس کے لیے 70 ارب روپے سے زائد کی رقم شامل کی گئی ہے۔

سی پی پی اے نے نیپرا کو بجلی کی اوسط قیمت سے متعلق چھ مختلف تجاویز ارسال کی ہیں، جن میں آئڈیل کیس کے تحت بجلی کا فی یونٹ ٹیرف 25 روپے 88 پیسے رکھنے کی تجویز بھی شامل ہے۔ نیپرا اتھارٹی ان تمام تجاویز کا جائزہ لینے کے لیے 2 نومبر کو باقاعدہ عام سماعت کرے گی، جس کے بعد حتمی ٹیرف کا فیصلہ کیا جائے گا۔